අපේ ගමේ පශු සම්පත්

ඒ 2007  වසරේ ආරම්භයයි .   මා  උසස් අධ්‍යාපනයට  මෙරටට පැමිණ ගතවී තිබුණේ අවුරුද්දකටත් අඩු කාලයකි.

එතෙක්  මගේ   පුද්ගලික  වියදමින් ඉගෙන ගත් මට   අපේ  ලැබ්  එකෙන්  ජිවන වියදම් දීමනාවක්ද ගෙවන්නට  පටන් ගත්තේ   ඒ කාලයේමය.

හේතුව  ඔවුන්ට  ලැබුණු  රිස්ච්ජ් ග්‍රාන්ට්  එකේ  පි. එච්. ඩි. අයදුම්කරු ලෙස මටත් ගානක් වෙන්කර තිබීමයි. 

නිම්මිට තවමත්  වාහන  පැදවීමට  නොහැකිවීම  අපේ අතිරේක  අදායම්  මාර්ග වලට  සෑහෙන බලපෑමක් විය.
තාත්තා වත් ගෙන්වා ගත්තා නම් ඇයට  රියදුරු බලපත්‍රය පමනක් නොව රැකියාවක් ආරම්භ කිරීමටද ඉඩකඩ සැලසෙනු ඇත. 

මාසික ගෙවීම්  ආරම්භ වීමත් සමග  අපේ  අදායම  තරමක්  ඉහළ ගිය බැවින් මගේ හිතට  තවත් සැලසුමක් පැමිණියේය.

"දැන් වෙලාව හොඳයි  අපේ මස්සිනාලා  ටිකට එහෙම උදව් කරන්න. ඒත් ඉංග්‍රීසි බැරුව  එකෙකුට වත් මෙහෙ එන්න බෑනේ . 

මුලින් තාත්තා ගෙන්න ගන්නවා  මෙහාට . ඊට පස්සේ එයා ලව්වා අනිත් අයව  ( මස්සිනාලා ටික) ෆෝම්  කරවනවා. " .

මේ සිතිවිල්ලේ ප්‍රතිඵලයක් ලෙස අපේ තාත්තා අප සිටි රටට   පැමිණියේය. 

 ඒ සමගම  මම විශ්ව විද්‍යාලයට  ගිය පසු ඔහුට  එන කම්මැලිකම  / ලංකාව ගැන මතක් වෙන එක  ආදිය මග හරවන්නට  වැඩ පිළිවෙලක් අවශ්‍ය විය.

ඒ වෙනුවෙන්  තාත්තාගේ හිත  ගමේ නිතර ගැවසෙන අන්දමේ  ව්‍යාපෘතියක් ගැන සිත යොමු කලෙමි.

ඒ අනුව  අපේ  නෑදෑයින්ට  උදව්  කළහැකි යමක්  සහ  අනෙකුත් ගම්  වැසියන්ට  උදව්  කල හැකි අයුරක් ගැන සිතන්නට අවශ්‍ය විය.

නෑදෑයින්ට  උදව් කිරීම  තාත්තා  මා සමග සිටිද්දීමත්  ගම හැදීමේ  වැඩකටයුතු  ඒ කාලයේදී ඔහු සමග සකච්චා  කරමින් සිටීමත් පමණක් කිරීමත් මගේ අදහස විය.
(ඇත්තම කිව්වොත් අප ජීවත්වන් ඔස්ට්‍රේලියාවේ මිනිස්සුන්ගේ ජීවන රටාව ගතවෙන පහසුව සහ ලංකාවේ අපේ නෑදෑ හිතවතුන්ගේ ජීවන රටාවල ඇති අපහසුව තාත්තා හොඳින්ම ග්‍රහණය කරගත්තා. ඒ නිසා ඔහුත් සමඟ මෝටර් රථයේ එහාමෙහා යද්දි අපේ මිනිස්සු මේ තත්ත්වයට ගේන්න අපිට කළහැකි දේවල් ගැන මම ඔහුත් එක්ක නිතර නිතර සාකච්චා කලා  ඒ අනුව අපිට ලංකාවේ කරන්න පුලුවන් වැඩපිළිවෙලක් ගැන අපි අදහසකට ආවා)


මේ ක්‍රියාදාමය  අවසානයේ  බිහිවූ මූලික  ව්‍යපෘති  දෙකකි. 

1.  ලෙනදොර සහ අපේ නංගිලා බැඳපු  මස්සිනාලා  ටිකට  ඉංග්‍රීසි (  IELTS සඳහා )  සහ මේසන් වැඩ  ( Brick Layering )  ඉගැන්වීම ඉන් එක් ව්‍යාපෘතියකි.

මෙය මගේ පුද්ගලික වියදමින් සිදු කෙරුනේ තාත්තා මේ රටේ සිටියදීමය. ( මේවෙනුවෙන් අප ගිය දිගු ගමනේ  කතාව ඉදිරියේදී බලා පොරොත්තු වන්න) .

එය කොටස් කිහිපයකින් යුත් මෙගා  බ්ලොග් පොස්ට් එකක්  වනු නොඅණුමානය.

2.  අපේ ගමේ  (කිරිඔරුව මාරබැද්ද ගම්දෙකේ)   සමාජ සංවර්ධන  ( ග්‍රාමීය සංවර්ධන ) ව්‍යාපෘතියක්  ආරම්භ  කිරීම ඒ අනෙක් වැඩ පිළිවෙලයි.

 එය ආරම්භ වුයේ තාත්තා නැවත ලංකාවට ගියාට පසුවයි. 

තාත්තා මෙහි සිටි මාස දහය ( අවුරුද්දකට  විසා ගෙන පැමිණියද  මාස දහයකින් පසු ඔහු නැවත ලංකාවට  යන්නට තීරණය කළේය ) තුල ක්‍රියාවට  නැංවුයේ  ලෙන්දොරලා ට  ඉංග්‍රීසි , පරිගණක සහ මේසන් වැඩ ඉගැන්වීමයි. 

කිරිඔරුව මාරබැද්ද ගම්දෙකේ ග්‍රාමීය සංවර්ධන ව්‍යාපෘතිය  ආරම්භ වුයේ 2008 ජුලි අගෝස්තු කාලයේ තාත්තා නැවතත් ලංකාවට ලඟා වීමත් සමගයි. 

එහෙත් තාත්තා මෙහි සිටි මුළු කාලයේම ඔහුගේ හිසට එකිනෙකට වෙනස් සංවර්ධන සැලසුම් යෝජනා කරමින්  ඔහු අපේ ගමේ හිතින් ජිවත් කරවීම දිගටම කරගෙන ගියෙමි.

ඒ සඳහා  මේ ග්‍රාමීය සංවර්ධන  යෝජනාව  මට මහත් සේ ප්‍රයෝජනවත් විය.

මේවා තාත්තා සමග සාකච්චා කරමින් කාලය  ගත කරන අතරේ  විශ්ව විද්‍යාලයේ  වැඩත් , අතිරේක රැකියාත්  කරමින් නිම්මිට  රියදුරු  බලපත්‍රයක්  සහ ඇයට   වැඩිහිටියන්ට  සැලකීමේ හෙද  පාඨ මාලාවක් කරවුයෙමි.

ඒ සඳහා තාත්තගේ  ආගමනය මහත් පිටිවහලක් වුයේ  ඔහු  අප දෙදෙනා නිවසේ නැති අතරේ සෑහෙන  චන්ඩියෙකු වූ අපේ සුපුන්  ( එවිට ඔහුගේ වයස  අවුරුදු  3කි ) බලාගැනීම  නිසයි.. 

ගම ගොඩනැගීමේ  යෝජනා 

මෙහිදී  මගේ ප්‍රධානම  බලාපොරොත්තුව වුයේ  ගමේ  ළමයින්ට හොඳ අධ්‍යාපනයක්  ලබා දෙන අතරම ඔවුන්ගේ දෙමව්පියන්ට හොඳ අදායම් මාර්ග ඇති කිරීමයි.

ඒ වෙනුවෙන්  තාත්තා සහ මා එකතුව සකස් කල සැලසුමට අනුව පහත සඳහන්  යෝජනා ඇතුලත් විය .

1. කිරිඔරුව, මාරබැද්ද , අසල ඇති කේෂන් වත්ත  යන ගම්මාන වලින් එන ප්‍රාථමික වයසේ සිසුන්ට ( 11 වසර දක්වා ) නොමිලේ ඉංග්‍රීසි අධ්‍යාපනය ලබා දීම ( සති අන්තයේ පැවැත්වෙන පන්තියක් මගින්)

2. එම සිසුන්ට නොමිලේ පරිගණක පුහුණුව ලබා දීම.( සති අන්තයේ පැවැත්වෙන පන්තියක් මගින්)

3. කිරිහරක්  හැදීමට කැමති පවුල් තෝරා ඔවුන්ට නොමිලයේ  උසස් තත්වයේ  කිරි හරක් ලබා දීම.

4. ඒ  හරක් ගෙන් ලැබෙන  ගොම සහ  ගෙවල් වලින් ඉවතලන  කුණු යොදාගෙන  නිවෙස් වලම  කොම්පෝස්ට්  නිපදවීම.

5. මීමැසි පාලනයට  කැමති පවුල් වලට තම ගෙවත්තේ  තැබීමට  නොමිලේ  මීමැසි පෙට්ටි ලබා දීම. 

6.  හැම නිවසකම  කෙසෙල් ගස් දෙක බැගින් සහ කොස් පැලය මගින් සිටුවීම.

7. හැම නිවසකම  කුඩා ගෙවතු වගාවක් පවත්වාගෙන යෑමට  ගැමියන් උනන්දු කිරීම 

8  නොමිලේ  වුෂු  පාඨ මාලාවක් (අපේ පොඩිම මස්සිනා ස්වෙච්චා වෙන් ඉදිරිපත් වීම නිසා.  සති අන්තයේ පංති වලට  නොමිලේ  වුෂු  පාඨ මාලාවක්ද  එකතුවිය)

9. ඉගෙනීමට දක්ෂ එහෙත් ආර්ථික හැකියාවක් නැති ගැමි දරුවන්ට මාසික සිශ්‍යත්ව ලබාදීම

මේ යෝජනා මාලාව  ක්‍රියාත්මක කිරීමේ වගකීම  තාත්තා ට  නොදී අපේ  ගමේ තවත් සමාජ සේවයට කැමති  අයෙක් වූ  සුවඳරත්න  අය්යාට දීමට  තීරණය  කලෙමි. 

 ඔහු තාත්තට  වඩා  වයසින් අඩු වීමත් , මා විශ්වාස කළ පරිදි ගමට යම්සේවයක් කරන්නට ඔහු කැමැති බව පෙනීමත්   ඒ තීරණය  ගැනීමට  හේතු පාදක විය.

මෙහිදී මට අවශය වුයේ  ශ්‍රී ලංකා යුඇන්පී  ලෙස බෙදී වෙන් වී තිබු අපේ ගම් දෙකේ පක්ෂ භේදයකින් තොරව  කාර්යය  සිදු කිරීමයි.

තාත්තලා සුවඳේ ලා හොඳ වැඩ කලා වුවද  ඔවුන් ශ්‍රී ලංකා කාරයින් වීම  මේ වැඩේ හොඳකමට  බලපෑමක්  කරනු ඇතැයි මා සිත තුල වූ බිය ඊට හේතුවයි.

ඒ ඔවුන් තමන්ට පක්ෂ මිනිසුන් තෝරා ගනු ඇතායි යන සැකයටත්  වඩා ගම් තුලානේ අයගේ චින්තන රටාව දන්නා බැවිනි.

ගැමියන්බොහෝ විට සිතන්නේ
"මියක් කඩන්නේ අත ලෙව කන්න නෙවෙයි  නේ , මේකේ මොකක්හරි වාසියක් ඇති මෙයාලට......, සමහරවිට සුවඳේ හරි කවිඳුගේ වෙන නෑදෑයෙක් හරි මෙහෙන් චන්දේ ඉල්ලයි.... "
යන අර්ථය ඇතිව බව මා හොඳින් දන්නා කාරණයකි.

අප කල දේවල් වල  එවැනි ලාභ ප්‍රයෝජන කිසිවක් ගැන සිතේ නොතිබුනත් ගැමියන් එවැනි දේ සිතිය හැකි බැවින් පක්ෂ පාට පමණක් නොව ජාති භේද ද නොසලකා මෙය සිදුවිය යුතූ බව මාගේ අදහස විය.

ඒ නිසාම ශ්‍රී ලංකා , යු ඇන් පි  දෙපැත්තේම ඉන්න අයට වගේම නිර්පාක්ෂික අයටත්,   ඔවුන්ගේ  ආර්ථික තත්ත්වයත්  ඊට අමතරව හරකෙක් හැදීමට ඇති කැමැත්තත්  සලකා බලා  සතුන් ලබා දෙන ලෙස ඉල්ලා සිටියෙමි.

ඊට අමතරව අසල පිහිටි තේ වත්තේ ලැයිම් කාමර වල සිටිනා ද්‍රවිඩ පවුල් කිහිපයකටද (සිංහල අයට පමණක් නොව ද්‍රවිඩ ජාතිකයින්ටත් )  හරක් ලබා දෙන ලෙස උපදෙස් දුන්නෙමි.

එපමණක් නොව හරකෙක් ලබා දීමේදී හෝ මීමැසි පෙට්ටි ලබා දීමේදී   අප ඔවුන්ට  උදව්වක් උපකාරයක්  කරනවා කියා කිවයුතු නැති බව මගේ අදහස විය.

ඒ වෙනුවට එවා ලබන්නා අපේ වැඩ පිළිවෙල ක්‍රියාත්මක  කීරීමට දක්වන්නේ  මහත් උපකාරයක් බව මතක් කරන්නැයි මම සුවඳේ අය්යට පැවසුවෙමි.

ගමේ සියළුම ළමුන් ඉංග්‍රීසි , පරිගණක සහ  වුෂු පංතියට  යොමු කරවන ලෙසද  ඉල්ලා සිටියෙමි.

පංතිය ආරම්භක අවස්ථාවේදී සිසු සිසුවියන් හැත්තා පහක් එයට සහභාගී වූහ. ඒ අතර මල්දෙණිය සහ කිරඹ ඔය ගම් දෙකේ සියළුම නිවෙස් වල ළමුන්  වූහ.

ඉංග්‍රීසි ඉගැන්වූ ගුරුතුමා ( ඔහු අසල රජයේ පාසැලක ඉංග්‍රීසි ගුරුවරයෙකි ) මාසික දීමනාවක් ( රුපියල් 3000ක් ) ගෙවූ අතර එය පසුකාලීනව පන්දහස දක්වා වැඩි කළෙමු.

අනෙක් ගුරුවරුන් දෙදෙනා ඉදිරිපත් වුයේ ස්වෙච්චාවෙනි .

රුපියල් 29500 ක්  ගෙවා  පරණ ලැප්ටොප්  පරිගණයක්  රැගෙන දුන්නේ පරිගණක පංතිය වෙනුවෙනි.

හරක් ව්‍යාපෘතියේ මුල් සතුන් පස් හයදෙනාම ලබා දෙන්නට සිදු වුයේ මගේ පුද්ගලික මුදල් වලිනි .

මුල්ම හරකා 

ඉහත  යෝජනා මාලාවේ  එක ප්‍රධාන  යෝජනවක්  වූ පශුසම්පත  දියුණු කිරීමේ  වැඩ  පිළිවෙල මුලින්ම  ආරම්භ කලෙමි.  

මට  ස්ථිර මාසික අදායමක්  ලැබීමේ  ප්‍රීතිය  නිමිත්තෙන් වෙන් කල රුපියල්  පනස්  දාහක  මුදල  ඒ වෙනුවෙන්  මුලින්ම  වැය කලෙමි.

මුල්ම  හරකා  අපේ ගමේ  සිරිසේන අය්යාට  දෙන්නට  තීරණය  කලේ  සුවඳේ අය්යා , තාත්තා ඇතුළු පිරිසක් විසිනි. සිරිසේන අය්යා  අපේ  ගමේ හංදියේ කඩයක්  කල බුරුස්  මාමාගේ  පුතෙකි.

                                චමින්දගේ  මාමා  ( නම නොදනිමි )  තම  තාවකාලික  ගාල අසල 

අපට නෑදෑ කමක් නැති අයටත් , සුවඳේ අය්යා කැමති අකමැති හැමෝටමත්   ( ශ්‍රී ලංකා යුඇන්පී භේදයකින් තොරව) කේෂන් වත්තේ  දෙමළ කම්කරුවන්ටත්  හරක්  ලබා දෙන ලෙස මා ඉල්ලීමක් කලේ  සුවඳේ අය්යා සහ තාත්තා  වැඩිපුර  නෑදෑයින්ට  අදිනා බවක් දැනුණු නිසාය.

මුල්ම  හරක් ලාභියා ලෙස   අපේ ලොකු තාත්තගේ  දුවෙක් හා විවාහ වී සිටි  සිරිසේන තෝරා ගැනුනේ ඔහු දැක්වූ අධික උනන්දුව නිසා බව කියවිණි.

සිරි සේන අය්යා හරකා හදන අතර ලැබෙන කිරි  මිල්කෝ හෝ නෙස්ලේ වෑන් වලට නොදී ගමේ අයටම බෙදා දෙන්නයි ( මුදලට)  මම ඉල්ලීමක් කලෙමි.

කිරි බෙදා දීම සඳහා ජේන් අක්කලා මැණිකේ සහ තවත් කාන්තාවක්  යෙදවුයෙමි. ඒ සුවඳේ සහ අපේ තාත්තගේ  මැදිහත් වීමත් ඇතිවය.

දවස්  කිහිපයක්  ගමේ කිරි විකිණීම ජයටම කෙරීගෙන ගියේ අප කුඩා කාලේ මෙන් නැවතත්  නැවුම් කිරි විදුරුවක රස ගමේ කැමති කෙනෙකුට  ලබා ගන්නට ඉඩ සලසමිනි.

එහෙත් හිටි හැටියේම සිරිසේන ගමට කිරි විකිණීම  නවතා දැමිය.

ඒ වෙනුවට  ඔහු මිල්කෝ වැන් එකට කිරිදෙන්නට  පටන්ගෙන තිබුණි

ගමට කිරි විකිනීමේ අදහසට  සිරිසේන නම්මා ගැනීමට සුවන්දෙට  නොහැකි වූ අතර මට දුරකථන ඇමතුම් හරහා සිරිසේන ට මෙය පැහැදිලි කරන්නට සිදු විය.

"මල්ලී ගමේ ගෑනුන්ට කිරි දුන්නේ දවස් පහයි . වැස්සිගේ කිරි බුරුල්ල පුපුරලා ගියා ඇස්වහ  කටවහ වැදිලා  "
සිරි සේන අය්යා තම හදිසි වෙනස් වීමට  හේතුව ලෙස මට පැවසුවේය.

"කිරි බුරුල්ල පුපුරලා නම්  පශුවෛද්‍යවරයා ලඟට යන්න. ගමට කිරිදෙන එක නවත් වන්න එපා "

මම ඔහුගෙන් ඉල්ලා සිටියෙමි.

පසුකලෙක  සිරිසේන අය්යා  සුවඳේ සමග විරසක වූ අතර  අපේ හරකා නැවත  සංවිධානයට  ලබාදෙන්නට  ද වග බලාගත්තේය.

අද වනවිට  ඊට කලින් හරක් නොහැදු  සිරිසේන අය්යා  සාර්ථක  කිරි ගොවියෙකි. ඒ  අප පෙන්වා දුන් පාරේ  තමා තනිවම ගමන් කිරීමේ  ප්‍රතිඵලයක්  වශයෙනි.

දෙවන  සහ තුන්වන කිරි ගොවියෝ 

අපේ  දෙවන හරකා ලබා දුන්නේ  ජයසිංහ නමට  කිසිදු සම්බන්ධයක්  නැති  අපට  දුරින් හෝ නෑදෑකමක් නැති අයෙකුටයි.

ඒ ගමේ අහිංසක පවුලක කෙනෙක්  වූ  චමින්ද විජේසේකරටයි .

මේ වනවිට  අපේ තාත්තා කෙලින්ම  ව්‍යාපෘතියට  සම්බන්ධ නොවූ බැවින් සියළු තීරණ ගැනුනේ සුවඳේ අය්යා  මගිනි.
  

අපේ ව්‍යාපෘතියේ තුන්වන හරක්  ලාභියා   @#$%  නම් වූ අයෙකි.    ඔහුට එක හරකෙක් නොව හරක් තිදෙනෙක්ම  ලබා දීම සිදුවිය.

 ඒ මගේ  එතරම්ම  කැමැත්තක් නැතිව තිබියදීයි.

"@#$%  මල්ලි දක්ෂයා . එයාට රස්සාවකුත් නැති නිසා මේ වැඩේ හොඳින්ම කරනවා කියලා කිව්වා "

සුවඳේ මා අස් වැසුවේ @#$%   ව්‍යාපෘතියේ සාර්ථකම  කිරි ගොවියා විය හැකි බව කියමිනි.


@#$% ඒ වනවිට උතුරු නැගෙනහිර යුද්ධය අතර තුර සිදුවූ  කිසියම් අකටයුත්තකට  වැරදි කරු වී වැඩ තහනම් වී සිටියේය.

ඔහු ඒ වන විට  විශේෂ කාර්ය බලකායේ සාජන්  වරයෙකි.   මා දන්නා පරිදි ඔහු නැවතත් පොලිසියේ  සේවයේ පිහිටුවා තිබේ

ඒ  අදාළ    සිද්ධියට  ඔහුගේ  සම්බන්ධයක්  නැති  බව පරීක්ෂණ වලින් සනාථ වීමෙන් පසුවය


මා පවුලට සම්බන්ධ අයට  සතුන් දිය යුතු නැති බව කියද්දීත් සුවඳේ අය්යා @#$%ට හරක් තුන්දෙනෙක්ම දුන්නා මතකය.

ඒ මේ හරක් වෙනුවෙන් වැය වන්නේ මගේ පුද්ගලික මුදල් බව හොඳින් දන්නා නිසා විය හැකි යැයි මා අනුමාන කලෙමි.

"අපේ එකාගේ සල්ලි අපේ එකෙකුට දෙනවා " යන සිතිවිල්ල ඔහු තුල තිබෙන්නට ඇත.

ඒ නිසාමදෝ  ඔහු @#$%ට නිව් ජර්සි වර්ගයේ හොඳම හරක්  දී චමින්දට  දුන්නේ දුඹුරු පැහැති දෙමුහුන් වර්ගයක එකෙකි.

මා කොතරම් ගමේ අනික් අයට  හරක් දීපන් කීවද සුවඳේ අය්යා  කැරකි ගොස් නැවතුනේ  නෑදෑයෙක් ළඟමය.

නෑදා කම් පක්ෂ සබඳකම් නැති දෙදෙනෙක් ලෙස මගේ පෙරැත්තය නිසා හරක් ලාභීන් වූ  චමින්දත් ඔහුගේ පුංචි අම්මාගේ මහත්තයත්  තවමත් සාර්ථක කිරි ගොවින් ලෙස අපේ ගමේ සිටිති.


එහෙත් ඉහත කී @#$%  හරක් ට වල් කැපීමට අමාරු බවත් , වල් ඇදීමට ලෑන්ඩ් මාස්ටරයක් අවශ්‍ය බවත් කියා සුවඳේ ට කරදර කරන්නට  වැඩි කාලයක් ගියේ නැත.

එසේ නොවුනොත් හරක් තිදෙනා විකුණා දමන බවටද ඔහු තර්ජනය කරන්නට විය.

පසුව ඔහුගෙන් සිදුවූ කරදර ඉවසුනු බැරි වූ සුවඳේ අය්යා මට කරදර කරන්නට වුයේ

"චුටි මල්ලි මේකට මොකක් හරි පිලියමක් යොදන්න" කියමිනි.

එපා කියද්දී අහක යන නයි රෙද්ද පල්ලේ දාගත් සුවඳේ සහ අපේ තාත්තලා ගැන දුක් වූ මා

"එහෙනම් @#$%ට කියන්න හරක් ටික විකුනලා මුදල් සුවඳේ අය්යාගේ  අරමුදලට දෙන්න කියලා "

 යැයි පැවසුවෙමි .

අවසානයේ  මගේ මුදල් වලින් රැගෙන දුන් හරක් තිදෙනා විකුණා ලැබුණු මුදල ලෙස ඔහු සුවඳේ අය්යාට රුපියල්  හතලිස් දාහක්  ලබා දී තිබුණි.


එහෙත්  චමින්ද ඇතුළු අනික් කිරි කරුවන්ට  කිරි වෑන් එක ලඟදි ආරංචි වී  තිබුණේ  විකුණු මුදල රුපියල් හැටදහසක්  බවත්  ඉන් විසිදහසක්  @#$%  ලබාගෙන ඇති බවත්ය.

චමින්ද  විජේසේකර - 2008 සිට අද දක්වාම  තම  කිරි කර්මාන්තය  සාර්ථකව  කරගෙන  යයි.  

චමින්දගේ  ගාල අසල ඇති ගොමගොඩ 

පසුකාලීනව  අප සිටි ප්‍රාන්තයේ නවක සංක්‍රමණික ශ්‍රී ලාංකිකයින්  පිරිසක්  එකතු කරගෙන  සංවිධානයක් පිහිටුවා ගත්තේ  මේ ව්‍යපෘති  ඉදිරියට  කරගෙන  යෑමට මගේ මුදල් පමනක්     ප්‍රමාණවත්  නොවන බැව් තේරුන නිසයි.

එයට නම ඉදිරිපත් කලේ  මගේ උදව්වෙන් තාවකාලික රැකියාවකට  ගිය නිසා අප සමග අත්වැල් බැඳගත්  "විස්කම්  "  විසිනි.  

විස්කම් ආදී ආනන්දියෙකු  බව පැවසුවා මතකය.  ඒ අනුව අපේ සංවිධානය  " Friends in Need  Adelaide 

" ලෙස නම් කෙරිණි. 

එහි සාමාජිකයින්  ( වැඩි පිරිසක්  අප මෙන් වැඩිදුර  අධ්‍යාපනය  ලැබීමට  මෙරටට  පැමිණි ශිෂ්‍ය පවුල් විය )  එකතු වී  ලබා දුන්  ඉවතලන බෝතල් සහ  කෑන්  ප්‍රතිචක්‍රීය කිරීමෙන් ලැබෙන  මුදල  අපේ  අරමුදලට  යොදා ගත්තෙමි.

එමෙන්ම මේ සමාජිකයින් බොහෝ දෙනෙක් මගේ උදව් උපකාර ඇතිව තාවකාලික රැකියා ආදියට  ගිය අය වූහ.

 මුලදී   බෝතල් , කෑන්  එතරම් ලොකු  ප්‍රමාණයක් ප්‍රතිචක්‍රීය  කරණය සඳහා     එකතු වුණේ නැති බැවින් මාසික වියදම් සහ  හරක් මිලදී ගැනීම සිදු කෙරුනේ  මගේ පුද්ගලික  මුදල් වලිනි.



එහෙත් අපේ නෑදෑයින් ගෙන්  බේරීම සඳහා ඒ  මුදල් එවුයේ මා පුද්ගලිකව නොව සංවිධානයකින් යැයි කියන ලෙස සුවඳේ අය්යාට උපදෙස් දුන්නෙමි.

පසු කලෙක අපේ බෝතල් අදායම වැඩිවන්නට විය. ඒ  අළුත පැමිණි ශිෂ්‍ය යුවලක් මගේ ව්‍යායාමයේ අගය සත්‍ය ලෙසම තේරුම් ගැනීමත් සමගිනි.

ඔවුන් විවිධ  සුපර් මාර්කට් පිරිසිදු කර නැවත නිවසට එද්දී ( රෑ දෙකට තුනට පමණ) අපේ යුනිට් එක පිහිටි කොටසේ මගේ මෝටර් රථය අසලින් බෝතල් තිහ හතලිහක  පමණ බෑග් එකක් දමා යන්නට පුරුදු වූහ.

ටින් බෝතල් සියයක් යනු ඩොලර් 10කි  . ඒ අනුව ඒ දෙදෙනා සිටි කාලයේ  සංවිධානයේ අදායම  සීග්‍රයෙන් ඉහළ ගියේය  

මේ සියල්ල සුවඳේ අය්යට  පවසා  නිතර නිතර දුරකථන ඇමතුම් ගත්තෙමි .

ඒ අප ගමේ අයගේ සුභ සෙත වෙනුවෙන් කරන්නාවූ මේ ක්‍රියාව එතරම්  ලෙහෙසි පහසු නැති බවද මතක් කර දෙමිනි.

එහෙත් ඔහු ව්‍යාපෘතිය  ආරම්භ කලේ  ගම පුරා ලොකු ප්‍රචාරයක්  කරමිනි.

සමහර විට @#$% ලාට  එහෙම මේ නිසා අප අධික අදායමක් ලබනා සංවිධානයක් යැයි වැරදි වැටහීමක් ඇතිවන්නට ඇත.

ටින් බෝතල් ප්‍රතිචක්‍රීකරණය කර මුදල්  එකතු කල අපගෙන් ලෑන්ඩ් මාස්ටර් ඉල්ලන්නට ඔහු පෙළඹෙන්නට ඇත්තේ එබැවින් විය යුතුය. 

සුවඳේ අය්යා  අප ව්‍යාපෘතිය වෙනුවෙන්  සකස් කල පොත් පිංචක්  මා අතට  පත්වී තිබේ .

එහි කියනා හැටියට අප විද්වත් සංවිධානයකි.  

ලොකු අදායමක්  උපයන  සංවිධානයක් විය හැකි බවට ඉඟි පළකර තිබුණේ නැත්තේද නොවේ.

(විස්කම් ආර්තිකව ශක්තිමත් වීමත්, මම රටේ වෙනත් ප්‍රාන්තයකට මාරුවී යාමත් , අපට බෙහෙවින්ම උදව්කල තරුණ යුවල නැවත ලංකාවට යෑමත් සමඟ අප ගොඩනැඟූ ෆ්‍රෙන්ඩ්ස් ඉන් නීඩ් සංවිධානය බිඳවැටී ගියේ දෙදහස් නවය -දහය කාලයේදීය )

ඒ කාලේ  අපේ  ගමේ නියෝජිතයා  වූ සුවඳේ අය්යා   පසුකාලයක   අපේ වැඩ වලින්  ඈත්  වී ගියේය . එහෙත් චමින්ද  සහ  ඔහුගේ    බාප්පා ළඟ තවමත්  අපදුන් පශු සම්පත් රැඳී පවතී.   

සිරිසේන  අය්යා තමාගේම  වූ  කිරිහරක්  ටිකක් බලාගෙන  සාර්ථකව  රටේ සංවර්ධනයට  දායක වෙයි. 

අපේ  හරක්  විකුණා දැමු @#$% නැවතත්  විශේෂ කාර්ය බලකායේ සේවයට එක් වී  සිටි. 

මුලින්ම පරිගණක පංතියත්, දෙවනුව වූෂු පංතියත් නැවතී ගියේ ඒවායේ ඉගැන්වූ ස්වෙච්චා ගුරුවරුන් ඉවත්වීම සහ ඒකාලයේ රටේ කොහේ හෝ තැනක වූෂු ගසා පාසැල් ශිෂ්‍යයෙක් මිය යෑමත් නිසයි. 

ඉංග්‍රීසි පංතියේ කිරිඔරුව කොටස මුලින්ම කැඩී ගියේ ගමේ ප්‍රභූ වරයෙක් "ඕවා එන් ජී ඕ, ඔයාලගේ ලමයින්ගේ ෆොටෝ පෙන්නලා කවිඳු මහත්තයලා සල්ලි හොයාගන්නවා ඇති එහේ " කියමින් ඔහුගේ ආයතනයට එන මව්වරු පියවරු භයකල නිසා යැයි රාවයක් පවතී. මාරබැද්ද කොටස තව වසර කිහිපයක් ඇදගෙන යෑමෙන් පසු ඉංග්‍රීසි ගුරුවරයා විසින්ම නවත්වනු ලැබූවේ  වැටුප් දෙන්නේ මගේ පෞද්ගලික මුදලින් බව ආරංචී වීමත් සමඟයි. 

අප තවමත් හෙමින් හෙමින් මී මැසි පාළනය සහ පශු සංවර්ධනය අපේ ගම් පළාතේ ප්‍රචලිත කරමින් පසු වන්නෙමු